Tauberbischofsheim I
Die ünner Bleich
Autorin: lrmgard Wernher-Lippert
Sprecherin: lrmgard Wernher-Lippert
Sprecherin: Friederike Kroitzsch
Früher hat dr Wörth ganz annerst ausgsähe. Do wuu haüt des Grünnerzentrum steht, woar früher des oalde Schlachthaus unn hinnedro dr ejgezöinde Gänsgarde, wall do die ünnererdisch verlejchde Oalde Boach, wie mr zum Mühlkanal gsocht hat, widder offe rauskumme is. Dorthi hat die Gänsherdin, die oald Naüsern, jeden Moarche die Gäns getriewe, wuu sie vorher bei de Haüser ejgsammelt unn die Boadgasse für getriewe hat. Uff der Wörthspitze woar die Bleich för all die kloane Haüsli in der Dörgei unn de Armegasse, wu weder ä Höifle, no ä Gärtle odder goar ä Balgönle ghot häwwe. Wu hät mer denn die Wäsch sunst druckne gsöllt?
Am Waschdoach hat a unner Omma die Bettdücher miit em Ziichwächele uff die Bleich gführt unn ausglejcht. Ejnes Doachs jedoch is sie lamedierend hoamkumme unn hat üwwer die Scheißgäns gwewwert, wuu aus ihrm Gehejch ausgebroche unn groadwächs üwwer die weiße Bettdücher zur Dauwer gwatschelt wäre unn dodebei Haüfli unn gelbgrüni Dabbe hinnerlosse hätte. Groadraus: die Wäsch war verschisse! Unn der arme Fraa is nix üwrich gebliewe wie alles miit de Hänn rauszuriwwle unn widder zu koche! Schejnts häwwe siich ä boar Kröidebuwe, die Routzlöffel, die, än Bosse draus gmocht, es Gänsgardedöörle uffstehne zu losse. Gfunne senn sie nie wordde.
Früher sah der Wörth ganz anderst aus. Dort wo heute das Gründerzentrum steht, war früher das alte Schlachthaus und dahinter der eingezaünte Gänsgarten, weil dort die unterirdisch verlegte Alte Bach, wie man zum Mühlkanal sagte, wieder offen zu Tage trat.
Dorthin trieb die Gänsehirtin, die alte Frau Neuser, jeden Morgen die Gänse, die sie vorher bei den Häusern eingesammelt und die Badgasse vor getrieben hatte. Auf der Wörthspitze war der Platz zum Wäschebleichen- und trocknen für all die kleinen Häuslein in der „Türkei“ (Stadtbezirk) und der Armengasse, die weder ein Höflein noch Gärtlein oder gar ein Balkönlein hatten. Wo hätte man denn sonst seine Wäsche trocknen sollen?
Am Waschtag hat auch unsere Oma die Bettücher mit dem Ziehwägelchen auf die Bleich geführt und ausgelegt. Eines Tages jedoch kam sie klagend heim und schimpfte über die Scheißgänse, die aus ihrem Gehege ausgebrochen und geradewegs über die weißen Bettücher zur Tauber gewatschelt wären und dabei Häufchen und gelbgrüne Tabben hinterlassen hätten. Geradeheraus gesagt: die Wäsche war verschissen! Und der armen Frau blieb nichts anderes übrig wie alles mit den Händen herauszureiben und wieder zu kochen! Anscheinend hatten sich ein paar Lausbuben, Rotzlöffel eben, einen Possen daraus gemacht, das Gänsgartentürlein aufstehen zu lassen. Gefunden worden sind sie nie.
