Text: Roland Scherer
Sprecher: Roland Scherer

Du, ich bin ja net neuschieri, aber wenn ich diech grod seh
do konn ich diech doch wos frooche, ha - des is aber schö.
Sooch emol - hots geschdern grächert bei äüch?
„Fuchze Lidder“ – oh mach ke Zäuch.

A in Höpfi hätts gschütt, wie aus Omer
un bei uns wors drukit, des glaabt doch kooner.
Außerüm, in Bretzi, Harde, Kennche überol hots runnerkhabe
un bei uns koon Tropfe - des is doch net zu glaabe.

Die Brehmer hätte sogor värzich Liter khot,
häbbe si heut morchen beim Dokder gsot.
Un mir Bülfemer, blous e boor Meeder nebedro gleeche
ha, mir bräuchte doch dringend a wedder mol Reeche.

De Garde is bockelhart, de Rase brauchscht nimmi möhe,
broutdruckit, do brauchscht a ken Schofmäuliszolot söe.
Do senn Riss im Boude, meji o meji
wenn do net uffbascht, fällscht no neji.

De Reechemesser is a e Fehlinvestition gwehe,
der hot no gor kon Reeche gsehe.
Konnscht a net alles aus em Hahne houle,
des konn doch koon Mensch mer bezohle.

Un des Wasser in Fässer houle,
des fällt mir gor net eji,
ich fohr doch net wechem Gieße
noch Brehme odder Kennche neji.

Ouh - guck emol, do hinne künnts ganz schwoarz,
sooch - wor des grod en Blitz,
werscht sähe - mir grieche wedder nix.
Es muss ja a net glei e böüschs Gwitter kumme,
dass es zsammehaabt die Ärn un a no die Blumme.

Sou en schöne Noochreche, wos monscht du,
die ganz Noocht hätts Zeit dezu.
Häut Middoch häbbe sie ja gmeldt,
über Frankreich sollt e groußes Reechegebiet leiche,
des soll a zu uns kumme – na, es werd sich zeiche.

Aber waascht, mir welle jetzt e boor Doch in Urlaub gejine,
do müsst der Reeche jetz a net grod seine.

Aldes Reimliedle, des in Bülfri in g‘selliger Runde gern gsunge werd.
Dargeboten von den „MGV Schlawinern“

Scho wedder e Liedl aus -
un no ko Fraa im Hausch,
Do föhrt e Dunnerwedder nei -
s‘ muss oni rei!
Ich hob vorred, vorred -
heirade du I net,
Iich brauch ko Kinnergschrei -
an meinem Bett!
Wenn abber e Reichi kummt -
heirad I zu jeder Stund,
Do is mer’s Kinnergschrei -
ganz onerlei!
Eins, zwei, drei -
un ald is net näu
Näu is net ald -
un worm is net kald.
Kald is net worm -
un reich is net orm
Orm is net reich -
un ungrod net gleich.
Gleich is net ungrod -
un en Wooche hot vier Rod
Vier Rod hot en Wooche -
un singe net sooche.
Sooche net singe -
un danze net springe
Springe net danze -
un Flöji sen ko Wanze.
Wanze ko Flöji -
un wouhl dut net weji
Weji dut net wouhl -
un läär is net voul.
Voul is net läär -
un e Dinschtknecht ko Herr
Un e Herr is ko Dinschtknecht -
un e Karpf is ko Hecht.
Un e Hecht is ko Karpf -
un e Zitter ko Harf
Un e Harf is ko Zitter -
un süß is net bitter.
Bitter net süß -
un Hänn senn ko Füß
Füß senn ko Hänn -
un es Lied hot e End.

Aldes Reimliedle, des in Bülfri in g‘selliger Runde gern gsunge werd.

Dargeboten von den MGV-Schlawinern