De Babbe als Mamme

Text: Mali Grimm
Sprecher: Harald Grimm

De Babbe zu de Mamme sejcht:
„Des is doch grad zum Lache,
Ihr Weiber kennt e Mordsgedei
mit ejrer Ärbet mache!
Iss des a ebbs, was ihr do macht?
Die meerscht Zeit werd doch blouß gegafft.
Des bissle Haushalt — eens, zwää, drei,
Des mach i glatt no nebebei!“
Ihr Lejt, ihr Lejt, des geit no was,
Wenn do de Babbe mol zum Spaß
Elee probiert, den Kram zu mache,
Ihr Lejt, des is zum Träne lache!
Denkt ejch, de Babbe, dick unn korz,
Um‘s Bejchle rim en blaue Schorz.
Unn in de Hand, do hot der Grubber
En Abwäschlappe unn en Schrubber.
Unn sou marschiert er unn mecht Sprich —
Zum Kotelettbacke in die Kich.
Die Panne stellt er hii mim Fett,
Es Kotelett klopft er um die Wett!
E Weile druff, o froocht net, wie,
Iss er vorspritzt bis an die Knie.
De Zucker nemmt er dann statt Saalz,
Unn unsern Babbe bis zum Halsch
Vun Mehl unn Ej verkleckert schwer,
Als ob er‘s Kotelett selber wär.
Es Mehl brennt aa, die Milch lääft naus,
Es stinkt unn qualmt im ganze Hausch.
Es Glaasch is hii, die Tass kaputt,
Die Kaffekanne ohne Zutt,
Es Hemm vorsengt, der Scherz vorrisse,
Es Essservice iss zammegschmisse!
Zu allem Uuglick hot indesse
Die Katz a no es Kotelett gfresse!
Es brodelt unn es kocht im Haafe,
Die Suppe, die is ibberglaafe.
Die Katz helt er unnerm Disch jetzt verre,
De Schnauzer gauzt, die Kinner plärre.
Uff eemol hot er gnunk vun seim Werk,
Vun der Glatz stejhn ihm die Hoor zu Berg.
De Hund kriecht no en Tritt, wo sitzt.
Die Kinner krieche a ee gspritzt.
Unn wie de Blitz unn wie de Dunner
Rennt er wie en Elefant die Treppe nunner.
Springt gleich in d‘Wertschaft nebendraa
Unn duddelt sich vor Wut een aa.
Unn wenn die Mamme voller Freed
Deheem net alles mache deet —
Ruhig, fleißig unn a gschickt —
Do wäärn mer alli scho verrickt.
Ohne Mamme wäär, ihr hebt‘s jetzt gheert,
De Babbe no ke Knallerbs wert.