Merdelschdoi voa zwaihunnad Joa

Text: Julia Schmitt und Horst Keller
Sprecherin: Julia Schmitt und Horst Keller

Merdlschdoina Keldahaus

Zwai Merdlschdoina unnahalde sich:
Hosch du gwissd, dass vor zwaihunnad Joa
de Doarfmiddlpungd vun Merdlschdoi die
Bannkelda waa?
Was? Aa noi! Vazehle mol!
Des alde Keldahaus isch um
sechzeehunnadooineachzich (1681) vum
pfälzische Owwaamd Mosbach gebaud worre.
Es hodd zu 11/12dl em Kurferschd un zu 1/12dl
de Gmooi ghead.
Ja un was wah do drinn dann sow lous?
Do drinn mussde alle Wengadbsidsa ian Wei
keldan un de zwansichschde Dail abliffare.
Un wie muss i ma des Haus voaschdelle?
Also des Keldahaus hod zwai Schdoggwerge
khad un e Gribblwalmdach. Des wah e riese
Ding, bschdimmd zwanzich Meda lang und gud
zee Meda braid.
Im unnere Schdog waare e grousi Boomkelda
un e gloini Kelda. Im owwere Schdog waa,
abbem Joa sibbzehhunnadsegsedreisich (1736),
de Kadollische ian Beedsaal. Owwedriwwa im
Schbeicha waad Uhr, un im Dachraida waard
Keldaglogge khange.
D`Leiniger häwwe d`Kelda 1811 weege
Baufällichkeit abgrisse un widda nai uffgebaud.
Du liewe Zeid. Ja isch die neie dann a sow lang
gschdanne?
A was. Dess hädde se a bleiwe losse kenne,
weil die Ejemools zwanzich Hegda Wengad sinn
imma wennicha worre, un so hod sich d`Kelda
nimma rendiad.
1845 häwwe d`Leiniger des Keldahaus widda
abgerisse un`s Baumadrial vakaafd!
Des haist, vun dem ganze Rieseding is heid ga
niggs mea do?
Naja, iwwarich gebliwwe isch `s Tüamle mit de
Keldaglogge, des haid uff unsamm Rodhaus
schdeed.
A des is jo indressand. Also wie des mim
Keldahaus war, hab i ned gwissd. Awa jezd wes
ich a, wuh`s Keldamennle dehom waa. Kennsch
du die Gschichd vum Keldamennle?
Was? E Keldamennle? A des sechd ma jetzt gar
niggs. Vazehl!
Des waa e Mennle, des nua so via Schuh hoach wa.
Was sinnen via Schuh? Do kann i ma jetzt ga nix
drunna voaschdelle…
Ha en Schuh sinn so uhgfeer achdezwansich
(28) Zendimeda.
Alla, dann sag doch glei, dass der Kerl grademol
en Meda zwansich grows waa.
Also, des Mennle war uhgfeer 1,20 grows un
hod imma en Huud middare braide Grembe
uffghad. Erschiene isch dea Gaischd imma
jemand, der elooi in de Kelda was gschaffd
hod. Er schdannd dann uuvahoffd neewa
demmjeniche un hod dem e Oaafaig gewwe.
A du vazehlsch Sache…
Ha, wenn i da sag. `s erschde mol isch des im
Herbschd sechzehhunnadachdeachzich(1688)
em hiesiche Kiefermaischda bassierd. Er hod
des Mennle schbeda noch oft gseeje, do hods
em dann awwa niggs mea gmachd.
Des gibbds jo ned. Gibds vun dem Kerl noch
mea Gschichde?
Haja was glaabschn du?! Ich kend da noch
viel vazehle. Schbannend isch nua, dass alle
Gschichde, die vum Keldamennle vazehlt
werre, in de alde Kelda bassierd sin. Als ma
die dann abgrisse hod, was Keldamennle
vaschwunne.
Des waa ma jetzt wirklich nei. Awwa bass uff.
Sechd dir de Lenneboom noch was?
Ja glaa, du mohnsch denn an de Brigge?
Noi, ich mohn de growse Lenneboom. Der wu
neewa de alde Kelda gschdanne waa.
Was? Noi. Also dea secht ma jetzt nix.
Ha der waa 30 Meda houch, un de
Schdamm iwwa en Meda digg. Ende de
achzehhunnadfünfzicha (1850) Joa hod ma
um den Boom e Kalgschdoimaua gebaud und
neinzehnhunnadzwölf (1912) hod man, wegem
Alda, ummache messe.
Waa dea sow ald?
Ja, dea muss um die fünfhunnad Joa ald gwesse
sei. Genau wais ma des naddirlich nimma.
Un der Lenneboom waa sogah uffm Schdembl
vun de Gmooi. Iwwa zwaihunnad (200) Joa lang
waa dea doo druff.
Also du vazehlsch do Sache. Des hawwi aa no
nie ghärd. Ja un wu isch der Boom un die ganz
Kelda eigendlich gschdanne?
Haid schdeed do wudd Kelda mool waa
en Baurehouf midd Schaian un Schdall, un
`d Merdlschdoina wisse nimma, dass ian
Doafmiddlpungd mol im Hinnaegg waa.